Сүүлийн жилүүдэд гоо сайхны салбарт био технологи буюу лабораторид тусгай аргаар гарган авсан орцууд улам л эрэлттэй болж байгаа билээ. Тэдгээрээс гиалуроны хүчил, пептид, бактерийн фермент зэрэг найрлагууд хэрэглэгчдийн дунд хэдийн танил болж, косметик бүтээгдэхүүний гол орцуудын нэгээр дурдагдаж байна. Харин саяхнаас хүн, амьтан, ургамлаас гаргаж авдаг үүдэл эс хэмээх шинэ найрлага шинжлэх ухаан төдийгүй гоо сайхны салбарынхны анхаарлын төвд орж эхэллээ. Үүдэл эс нь арьсны өөрийн нөхөн төлжих үйл явцыг эрчимтэй дэмжсэнээр эрүүл, гялалзсан арьсыг бий болгож, хөгшрөлтийн эсрэг өндөр үр дүн үзүүлэх чадвартай гэдгээрээ алдартай юм.

Ингээд үүдэл эс гэж яг юу болох, арьс арчилгаанд хэрэглэснээр ямар ач тустай талаар дэлгэрэнгүй танилцацгаая.

ҮҮДЭЛ ЭС ГЭЖ ЮУ ВЭ?

Хүний биед орших хамгийн чухал үүрэгтэй эсүүдийн нэг бол үүдэл эс юм. Үс, арьс, яс, мах, өөх гээд биеийн бүх хэсэг үүдэл эсээс бүрдэж, нөхөн төлжиж байдаг. Тус эс нь дотроо "үр хөврөлийн үүдэл эс", "насанд хүрсэн хүний үүдэл эс" хэмээн хоёр төрөлд хуваагддаг. Үр хөврөлийн үүдэл эс нь эр, эм бэлгийн эс нэгдэхэд үүсэж, ургийн биеийг бүрэлдүүлдэг бол насанд хүрсэн хүний үүдэл эс нь биед маш цөөн тоогоор оршиж, гэмтсэн эсийг нөхөн төлжүүлэх, эрүүл байлгах гол үүргийг гүйцэтгэдэг.

Өнөөдрийн байдлаар үүдэл эсийг шинжлэх ухаанд төрөл бүрээр судлан, ашиглаж байна. Тухайлбал үүдэл эс нь элэг, бөөрний эдийг нөхөн сэргээх, хүнд хэлбэрийн ясны хугарлыг эмчлэх, чөмөг шилжүүлэн суулгах хагалгаанд ашиглах зэргээр олон төрлийн эмчилгээнд нэвтэрч эхэлжээ. Түүнчлэн судлаачид үүдэл эсийг лабораторийн нөхцөлд ургуулах замаар арьс, давсаг, тархи, элэг, бөөр гээд хүний биеийн бүхий л эрхтнийг үүсгэх боломжтой гэж үзэж, улмаар энэ талаарх судалгаа, шинжилгээний ажлууд хийгдсээр байгаа юм. Иймд АНУ, Япон, Өмнөд Солонгос тэргүүтэй өндөр хөгжилтэй орнууд хүүхэд эхээс мэндлэх үед хүйн цуснаас үүдэл эсийг салган авч (эцэг эхийн зөвшөөрөлтэйгөөр), гүн хөлдөөлтийн аргаар хадгалж эхэлсэн байна. Ингэснээр ирээдүйд тухайн хүүхэд өвдөхөд үүдэл эсийг нь ашиглан эмчлэх, шинээр эрхтэн ургуулах боломжтой гэсэн үг юм.

ҮҮДЭЛ ЭСИЙГ АРЬС АРЧИЛГААНД ХЭРЭГЛЭХ НЬ ҮР ДҮНТЭЙ ЮУ?

Гоо сайхны салбарт үүдэл эсийг ашиглан бүтээсэн эм бэлдмэл, эмчилгээ жил ирэх тусам олширч байгаа ба үүнийг дагаад үүдэл эсийн найрлагатай арьс арчилгааны бүтээгдэхүүнүүд ч худалдаанд гарсаар байгаа юм. Үүдэл эс нь уураг, амин хүчлийг өөртөө өндөр тунгаар агуулдаг тул арьсыг нөхөн төлжүүлэх замаар хөгшрөлтийг удаашруулах, нөсөө толбо бүдгэрүүлэхэд чухал нөлөө үзүүлдэг гэдгээрээ онцлог.

Саяхныг хүртэл мэргэжилтнүүд ургамлаас гаргаж авсан үүдэл эс гоо сайхны бүтээгдэхүүн үйлдвэрлэхэд хамгийн тохиромжтой гэж үзэж байсан ч Өмнөд Солонгос улсын Cha Biotech компани дэлхийд анх удаа хүний хүйн мезенхимээс гаргаж авсан үүдэл эсийг ашиглан гоо сайхны бүтээгдэхүүн үйлдвэрлэж чадсан байна. Тус бүтээгдэхүүн нь амьтан, ургамлаас гаргаж авсан үүдэл эсийн найрлагатай бусад төрлийн бүтээгдэхүүнүүдтэй харьцуулахад арьсны бүх давхаргад хүрч үйлчлэн, хурдан, чанартай үр дүн үзүүлэх чадвараараа ялгарч чаддаг гэнэ.

CHA BIOTECH КОМПАНИ БОЛОН EVERCELL БРЭНДИЙН ТУХАЙ

Өмнөд Солонгос улсын Cha Biotech компани нь 2002 оноос эхлэн үүдэл болон дархлааны эс дээр суурилсан төрөл бүрийн гений эмчилгээг хөгжүүлж буй анагаах ухаан, биотехнологийн чиглэлээр мэргэшсэн байгууллага юм. Ийнхүү тэд хөгшрөлтийн эсрэг өндөр үр дүнтэй бүтээгдэхүүнүүдээр дагнасан Evercell брэндийг салбарлан үүсгэн байгуулжээ. Тус бүтээгдэхүүнүүд нь арьсыг нөхөн төлжүүлж, уян хатан чанарыг сайжруулж, нүхжилт, үрчлээ, нөсөө толбыг бүдгэрүүлж, чийглэг, толигор байдлыг нэмэгдүүлж өгөх үүрэгтэй бөгөөд үүдэл эсээс гадна уураг, коллагенаар баялаг нидоген хэмээх орцыг бүтээгдэхүүнийхээ найрлагад шингээж өгсөн нь хэрэглэгчдийн анхаарлыг татаад байгаа юм.

Эх сурвалж: Buro247.mn

Нийтлэлүүд

Гоо сайхны салбарыг тэргүүлэх шинэ найрлага: Үүдэл эс

Нийтлэлүүд

Гоо сайхны салбарыг тэргүүлэх шинэ найрлага: Үүдэл эс